FH-ingar verða án Jakobs Martins Ásgeirssonar í oddaleiknum við ÍBV í undanúrslitum úrslitakeppni Olísdeildar karla í handknattleik á sunnudaginn. Á fundi aganefndar HSÍ á þriðjudaginn var Jakob úrskurðaður í eins leiks bann í viðbót við eins leiks bann sem hann var úrskurðaður í á fundi aganefndar daginn áður, 29. apríl.
Viðbótarbannið er tilkomið vegna ítrekunaráhrifa, segir í úrskurði aganefndar. Jakob hafði áður verið úrskurðaður í leikbann á fundi aganefndar 13. febrúar í kjölfar brots í viðureign Hauka og FH í átta liða úrslitum Poweradebikarsins 12. febrúar.
Jakob Martin var ekki með FH gegn ÍBV í maraþonleik liðanna í Vestmannaeyjum í gær og verður einnig utan FH-liðsins þegar liðin mætast í Kaplakrika á sunnudagskvöld klukkan 19.40 í úrslitaleik um sæti í úrslitum um Íslandsmeistaratitilinn.
Jakob Martin leikur í vinstra horninu, er öflugur hraðaupphlaupsmaður auk þess að vera afar útsjónarsamur varnarmaður. Hefur hann þar af leiðandi leikið stórt hlutverk, jafnt í varnar- sem sóknarleik FH-liðsins undanfarin ár.
Jakob Martin verður ekki með FH í Eyjum
