„Ég hlakka til að takast á við næsta andstæðing, Sviss, sem hefur leikið vel á mótinu og haft yfirhöndina í flestum viðureignum sínum en átt það til að missa forskotið niður undir lok leikja,“ segir Janus Daði Smárason sem hafði jafnað sig eftir viðureignina við Svía þegar handbolti.is hitti hann stuttlega að máli í gær í miðjum undirbúningi landsliðsins fyrir viðureignina við Sviss í dag. Leikurinn hefst klukkan 14.30.
„Landslið Sviss leikur afar fjölbreyttan handknattleik og er mjög óþægilegur andstæðingum. Við eigum að vera stærra liðið. Fyrir okkur er þetta úrslitaleikur við Sviss. Það er nauðsynlegt fyrir okkur að vinna. Meðan við eigum eftir leikinn við Sviss þá er ekki ráð að líta lengra fram í tímann,“ sagði Janus Daði Smárason landsliðsmaður.
