Valur getur orðið Íslandsmeistari í handknattleik kvenna í kvöld sigri liðið Hauka í þriðju viðureign liðanna um Íslandsmeistaratitilinn. Viðureignin fer fram í N1-höll Valsara á Hlíðarenda. Flautað verður til leiks klukkan 19.30.
Valur vann fyrstu viðureign liðanna, 30:28, á heimavelli á þriðjudaginn. Á föstudag áttust liðin við á ný á Ásvöllum. Aftur hafði Valur betur, 29:22. Haukar léku afar vel í fyrri hálfleik og voru marki yfir þegar leiktíminn var hálfnaður, 13:12. Valsliðið tók hinsvegar öll völd í upphafi síðari hálfleiks og skoraði fimm fyrstu mörkin. Segja má að Valsliðið hafi ekki horft um öxl eftir það.
Ef Haukar vinna á Hlíðarenda í kvöld fer fjórða viðureign liðanna fram á fimmtudaginn á Ásvöllum.
Leikurinn í kvöld verður sendur út á Handboltapassanum. Jafnframt verður textalýsing á handbolti.is.
