„Ég held að við getum verið nokkuð ánægð með þessi úrslit,“ segir Ágúst Þór Jóhannsson þjálfari Vals etir tveggja marka tap liðsins fyrir MSK IUVENTA Michalovce í fyrri viðureign liðanna í undanúrslitum Evrópubikarkeppni kvenna í handknattleik í Slóvakíu í dag, 25:23.
„Aðstæður voru erfiðar hér á útivelli. Mikil stemning og læti,“ sagði Ágúst Þór og bætti við að Valsliðið hefði unnið sig út úr erfiðri stöðu en það var sjö mörkum undir snemma í síðari hálfleik, 15:8.
„Stelpurnar sýndu mikinn karakter og frábæra spilamennsku í síðari hálfleik. Við hefðum getað krækt í jafntefli á síðustu mínútum. Heilt yfir framúrskarandi frammistaða. Varnarleikur og markvarsla var frábær.
Við eru svo sannarlega á lífi fyrir síðari leikinn. Með góðum stuðningi á Hlíðarenda eftir viku þá eigum við möguleika á að slá þetta lið út og komst í úrslitaleikina og brjóta þar með blað í íslenskum kvennahandbolta,“ sagði Ágúst Þór Jóhannsson þjálfari Vals eftir leikinn í Michalovce í Slóvakíu í dag.
Lengra viðtal við Ágúst Þór er í myndskeiði ofar í þessari frétt.
