„Við vildum þetta meira,“ sagði Jón Gunnlaugur Viggósson, þjálfari Víkinga í samtali við handbolta.is í kvöld eftir fjögurra marka sigur liðsins á HK, 26:22, í Olísdeild karla í handknattleik í Víkinni í kvöld.
„Það var mikilvægt að komast yfir undir lok fyrri hálfleiks. Markið sem Hamsa skoraði eftir að hann stal boltanum á síðustu sekúndunum skipti miklu máli. Í framhaldinu þá komum við mjög beittir inn í síðari hálfleikinn og við náðum svo sannarlega að leika heilsteyptan leik frá upphafi til enda í fyrsta sinn í vetur,“ sagði Jón Gunnlaugur og var skiljanlega glaður í bragði.
Jón Gunnlaugur sagði mikla vinnu liggja að baki þessum sigri eftir erfiðan róður og enda hægara sagt en gert að takast á við það verkefni sem það er að leika í Olísdeildinni.
Hægara um að tala en í að komast
„Að fara inn í tímabil þar sem menn reikna með að vera neðarlega og vera spáð neðsta sæti en vilja samt taka slaginn er eitt. Annar mál er takast á við það og fá rjómann af sviðsljósinu og gagnrýninni auk kröfunnar um að standa sig sem eykst með hverjum leiknum sem tapast. Það er ekkert sérstaklega gaman eftir því sem tapleikirnir verða fleiri.
Ég er þess vegna stoltur af strákunum sem hafa lagt enn harðar að sér síðustu vikur auk þess sem stjórnin hefur einnig spýtt hressilega í lófana með bættri umgjörð fyrir strákana fyrir leikina. Allt skiptir mjög miklu máli fyrir andlegan undirbúning sem skilaði sér að þessu sinni. Við mættum til þess að vinna og stóðum við þá ætlan okkar,“ sagði Jón Gunnlaugur sem lauk sérstöku lofsorði á alla leikmenn liðsins og nefndi ekki hvað síst Jóhann Reyni Gunnlaugsson sem Jón Gunnlaugur segir að sér kjölfesta liðsins.
„Ég er hrikalega ánægður með liðið og leikmenn sem hafa lagt mikið á sig til þess að vinna þennan leik,“ sagði Jón Gunnlaugur Viggósson, þjálfari Víkings.
