Víkingar voru KA-mönnum engin fyrirstaða í KA-heimilinu í kvöld þegar liðin mættust í síðasta leik 19. umferðar Olísdeildar karla í handknattleik. Þegar leikmenn Víkings komust loksins norður vegna ófærðar þá virtust þeir hafa fengið nóg eftir nokkurra mínútna leik. Þeir töpuðu með 15 marka mun, 33:18. KA fagnaði sigri í þriðja leiknum í röð og fór upp í sjöunda sæti með 16 stig þegar þrjár umferðir eru eftir.
Víkingar verða að bíta í skjaldarrendur og leika mikið betur í síðustu leikjum sínum í deildinni til þess að eiga möguleika á vera áfram í Olísdeildinni. Framundan er afar mikilvægur leikur gegn HK á miðvikudaginn. Úrslit þess leiks geta ráðið úrslitum um hvort liðið fellur í Grill 66-deildina.
Víkingar byrjuðu með hvelli og skoruðu þrjú fyrstu mörkin og fimm af fyrstu sex. Eftir það má segja að þeim hafi fallið allur ketill í eld. KA var fjórum mörkum yfir eftir fyrri hálfleik, 14:10. Heimamenn tóku öll völd á keppnisgólfinu í KA-heimilinu í síðari hálfleik.
Flottir í 50 mínútur
„Eftir upphafsmínúturnar leit út fyrir að við gætum lent í basli en segja má að eftir að við núllstilltum okkur eftir um tíu mínútna leik. Eftir það voru við ótrúlega flottir í 50 mínútur,“ sagði Halldór Stefán Haraldsson þjálfari KA í samtali við samfélagsmiðla félagsins eftir leikinn.
Hlekkur á myndskeiðsviðtal.
Algjört afhroð
„Við vorum flottir fyrstu tíu mínúturnar en hörmulegir eftir það. Þetta var algjört afhroð,“ sagði Andri Berg Haraldsson þjálfari Víkings í samtali við samfélagsmiðla KA eftir leikinn.
Hlekkur á myndskeiðsviðta.
Staðan í Olísdeildum.
Mörk KA: Einar Rafn Eiðsson 10/4, Dagur Árni Heimisson 6, Daði Jónsson 4, Arnór Ísak Haddsson 4, Logi Gautason 3, Jens Bragi Bergþórsson 2, Skarphéðinn Ívar Einarsson 2, Ólafur Gústafsson 1, Ott Varik 1.
Varin skot: Bruno Bernat 14, 45,2% – Nicolai Horntvedt Kristensen 0.
Mörk Víkings: Jóhann Reynir Gunnlaugsson 6/4, Stefán Scheving Guðmundsson 3, Gunnar Valdimar Johnsen 2, Agnar Ingi Rúnarsson 2, Styrmir Sigurðarson 2, Þorleifur Rafn Aðalsteinsson 1, Þorfinnur Máni Björnsson 1, Arnar Steinn Arnarsson 1.
Varin skot: Bjarki Garðarsson 7, 28% – Daníel Andri Valtýsson 3, 16,7%.
Tölfræði leiksins hjá HBStatz.
20. umferð miðvikudaginn 27. mars: Afturelding - KA. FH - Haukar. Selfoss - ÍBV. Fram - Stjarnan. Víkingur - HK. Valur - Grótta.
