Víkingur hefur kært framkvæmd leiks liðsins við Val 2 í Grill 66-deild karla í handknattleik sem fram fór á sunnudagskvöld. Þetta fékk handbolti.is staðfest hjá HSÍ í kvöld. Kæran er lögð fram vegna dómaramistaka en rangur maður tók á sig refsingu þegar Valsmenn gerðust brotlegir síðla leiks. Virtist það alveg fara fram hjá dómurum leiksins að maðurinn sem þeir viku af leikvelli hélt áfram eins og ekkert hefði ískorist meðan samherji hans sat í skammarkróknum.
Loga Finnssyni leikmanni Vals var vikið af leikvelli fyrir peysutog að því er virtist en samherji hans varð svo miður sín að hann brást við með því að ganga af leikvelli í stað Loga. Situr samherji Loga af sér refsinguna. Logi var atkvæðamestur Valsmanna. Dómararnir sofnuðu á verðinum að því er virtist.
Eftir því sem næst verður komist fer kæran áfram til dómstóls HSÍ sem mun væntanlega kalla eftir gögnum frá aðilum vegna málsins.
Víkingur tapaði leiknum, 31:29, og stendur nú jafn Gróttu að vígi í efsta sæti Grill 66-deildarinnar þegar keppni er hálfnuð, 12 umferðum af 24 er lokið.
