Viktor Gísli og samherjar í úrslit bikarkeppninnar

HBC Nantes sem landsliðsmarkvörðurinn Viktor Gísli Hallgrímsson leikur með, er komið í úrslit frönsku bikarkeppninnar. Liðið mætir PSG í úrslitaleik 1. júní. Nantes vann Toulouse, 28:26, í undanúrslitaleik í kvöld. Leikurinn fór fram í Toulouse.

Viktor Gísli gat því miður ekki varið mark Nantes í kvöld vegna meiðsla í olnboga sem hafa hrjáð hann síðustu vikur. Króatinn Ivan Pesic stóð í marki Nantes lengst af og varði 12 skot.

Thibaud Briet var markahæstur hjá Nantes með átta mörk. Julien Bos var næstur með sjö mörk. Ayoub Abdi og Nemanja Ilic skoruðu sex mörk hvor fyrir Toulouseliðið.

PSG vann Montpellier í hinni viðureign undanúrslita, 35:32, í gærkvöld.