Það verður Viktor Gísli Hallgrímsson og liðsfélagar hans í Barcelona sem mæta ungverska liðinu One Veszprém í úrslitaleik heimsmeistaramóts félagsliða í handknattleik karla í Kaíró í Egyptaland á fimmtudaginn. Barcelona vann sannfærandi sigur á Afríku- og Egyptalandsmeisturum Al Ahly, 26:21, í síðari undanúrslitaleiknum í kvöld.
Viktor Gísli var allan leikinn í marki Barcelona og varði 13 skot, 38% hlutfallsmarkvarsla.
Evrópumeistarar SC Magdeburg leika við Al Ahly um bronsverðlaunin og 50.000 dollara, jafnvirði liðlega 6 milljóna kr. Sú viðureign fer einnig fram á fimmtudaginn.
Barcelona var sex mörkum yfir í hálfleik, 14:8, og hafði átta marka forskot þegar fimm mínútur voru eftir af leiktímanum, 25:17.
Timothey N’guessan var markahæstur hjá spænsku meisturunum með sjö mörk. Dika Mem var næstur með fimm mörk. Yasser Saifeldeen skoraði fjögur mörk fyrir Al Ahly og var þeirra atkvæðamestur við markaskorun.
Sigurliðið fær 350.000 dollara í verðlaunafé, ríflega 42 milljónir kr. Silfurliðið hreppir 150.000 dollara, rúmlega 18 milljónir kr. og bronsliðið fær í sinn hlut 50.000 dollara, 6 milljónir kr.
