Þvert á allar spár eftir að hafa farið úr axlarlið í undanúrslitaleik Magdeburg og Barcelona í Meistaradeild Evrópu í handknattleik þá mætti Gísli Þorgeir Kristjánsson til leiks með Magdeburg í úrslitaleiknum gegn Kielce í dag.
„Úr því að hann vill leika og spila sig í gegnum verkinn datt mér ekki í hug að neita honum um að leika einn sinn stærsta leik á ferlinum. Læknar Magdeburg sögðu að hann gæti ekki orðið verri en hann er núna,“ sagði Bennet Wiegert þjálfari Magdeburg í samtali við þýska fjölmiðla rétt áður en úrslitaleikurinn hófst.
Wiegert sagði í gær að hann reiknaði með að Gísli Þorgeir yrði lengi frá eftir að hafa farið úr axalarlið í gær. Keppnismaðurinn Gísli Þorgeir vildi hinsvegar ekki missa af tækifærinu og taka þátt í úrslitaleiknum. Framundan er hinsvegar aðgerð á næstu vikum.
Gísli Þorgeir mætti inn á leikvöllinn við standandi lófaklapp stuðningsmanna Magdeburg sem hrópuðu nafn hans. Aðeins nokkrum sekúndum síðar skoraði Gísli Þorgeir sitt fyrsta mark í leiknum. Ekki leið á löngu þangað til hann hafði átt stoðsendingu á samherja sinn.
Framlenging hefst innan skamms en staðan er jöfn eftir venjulegan leiktíma, 26:26. Gísli Þorgeir lék af fullum krafti allan síðari hálfleikinn og skoraði fjögur mörk.
