Vilhelm Gauti verður Halldóri Jóhanni til aðstoðar

Vilhelm Gauti Bergsveinsson verður aðstoðarþjálfari meistaraflokks karla hjá HK og þar af leiðandi samstarfsmaður Halldórs Jóhanns Sigfússonar sem ráðinn var þjálfari karlaliðs HK til þriggja ára snemma árs.

Vilhelm Gauti þekkir vel til innan HK. Hann lék með liði félagsins og um árabil og var m.a. fyrirliði Íslandsmeistaraliðs félagsins 2012 og átti sæti í bikarmeistaraliðinu níu árum áður.

Síðar var Vilhelm Gauti þjálfari kvennaliðs HK og stýrði því m.a. upp úr Grill 66-deildinni. Einnig hefur hann þjálfað yngri flokka Kópavogsliðsins.

Síðar gat Vilhelms Gauti sér gott orð sem handknattleiksdómari um nokkurra ára skeið.

HK hélt sæti sínu í Olísdeild karla í vetur undir stjórn Sebastians Alexanderssonar og Guðfinns Kristmannssonar.