Samkvæmt fyrstu skoðun og áliti er ekki útlit fyrir að meiðsli landsliðsmannsins Janusar Daða Smárasonar séu eins alvarleg og óttast var í gærkvöldi eftir að hann meiddist í viðureign með Pick Szeged gegn Tatabánya í ungversku úrvalsdeildinni í handknattleik.
Heimildir handbolta.is herma að eftir skoðun í morgun sé það mat lækna ungverska liðsins að krossband í vinstra hné hafi ekki slitnað. Sé svo standa vonir til að Janus Daði geti jafnað sig á næstu sex vikum. Hinsvegar hefur krossbandaslit heldur ekki alveg verið útilokað, eftir því sem næst verður komist. Þess er beðið að fleiri rýni í niðurstöður læknisskoðunarinnar áður en kveðið veður upp úr um, af eða á.
Fleiri fara yfir gögnin
Þess vegna ætla fleiri læknar að yfirfara gögn úr læknisskoðuninni því betur sjá augu en auga. Samkvæmt heimildum handbolta.is munu m.a. læknar hér á landi rýna í gögnin auk fleiri lækna utan Ungverjalands.
Vonir standa til þess að niðurstaða liggi fyrir á morgun eða í síðasta lagi á miðvikudag eftir því sem handbolti.is kemst næst.
