„Við vorum ekki alveg nógu skarpir þegar upp var staðið,“ sagði Ásgeir Örn Hallgrímsson þjálfari Hauka við handbolta.is í gærkvöld eftir að lið hans tapaði fyrir ÍBV, 25:23, í fimmta og síðasta leik liðanna um Íslandsmeistaratitilinn í handknattleik karla í Vestmannaeyjum.
„Í fyrri hálfleik gáfum við boltann alltof auðveldlega frá okkur í seinni bylgjunni og markvörður ÍBV varði of oft frá okkur í opnum færum. Þegar kom fram í síðari hálfleik þá vorum við ekki nógu sterkir. Í stöðunni 12:12, áttum við möguleika á að komast yfir, tókst það ekki, klikkuðum þá illa í tveimur sóknum í röð. Upp úr því var á brattann að sækja og leikurinn okkur erfiður. Eyjamenn voru alltaf á undan,“ sagði Ásgeir Örn enn fremur og bætti við.
„Menn börðust eins og ljón frá upphafi til enda. Strákarnir eiga heiður skilinn. Þeir lögðu allt sem þeir áttu í leikina,“ sagði Ásgeir Örn Hallgrímsson sem tók við þjálfun Hauka í nóvember og stýrði liðinu alla leið í oddaleik í úrslitum um Íslandsmeistaratitilinn.
