Landsliðsmaðurinn Ýmir Örn Gíslason og fyrirliði þýska liðsins Göppingen fór fyrir sínum mönnum í kvöld þegar þeir kræktu í tvö dýrmæt stig í neðri hluta þýsku 1. deildarinnar í handknattleik með sigri á ThSV Eisenach, 31:27, á heimavelli. Ýmir Örn skoraði fjögur mörk úr fjórum skotum af línunni auk þess að vera allt í öllu í vörninni, að vanda og var m.a. einu sinni vikið af leikvelli í tvær mínútur.
Ýmir Örn og félagar voru með frumkvæðið í leiknum frá byrjun til enda. Staðan í hálfleik var 13:11, Göppingen í vil.
Göppingen færðust upp í 14. sæti af 18 liðum deildarinnar með 12 stig að loknum 19 leikjum og er aðeins tveimur stigum fyrir ofan Leipzig sem á leik inni. Grannlið Göppingen, Stuttgart, er næst á eftir með 10 stig.
Ludvig Hallbäck var markahæstur hjá Göppingen með sjö mörk. Svíinn Oskar Sunnefeldt og Ýmir Örn voru næstir á eftir með fjögur mörk hvor.
Þýska ungstirnið og landsliðsmaðurinn, Marko Grgic, var atkvæðamestur leikmanna Eisenach með 11 mörk.
