Mattý Rós Birgisdóttir hefur skrifað undir tveggja ára samning við handknattleiksdeild Víkings. Hún kemur til félagsins frá HK. Mattý er Víkingum ekki ókunnug. Hún lék sem lánsmaður hjá Víkingi fyrri hluta síðasta keppnistímabils. HK kallaði hana til baka úr láni í janúar. Svo vel líkaði Mattý Rós vistin hjá Víkingi að hún hefur ákveðið að endurnýja kynnin við liðið.
Mattý er hornamaður og tók þátt í 10 leikjum með Víkingi á síðustu leiktíð og skoraði 22 mörk.
„Við fögnum því að fá Mattý alfarið yfir til okkar og hlökkum til að fylgjast með henni á næsta tímabili,“ segir m.a. í tilkynningu handknattleiksdeildar Víkings.
Víkingur hefur að undanförnu samið við leikmenn sína og einnig að styrkt þjálfarateymi kvennaliðsins m.a. með komu Andrésar Gunnlaugssonar til samstarfs við Jón Brynjar Björnsson þjálfara.
Víkingur leikur í Grill 66-deildinni á næsta keppnistímabili.
Andrés er kominn til starfa hjá Víkingi
Auður Brynja er klár í slaginn með Víkingi
Konur – helstu félagaskipti 2023
