Júlíus Flosason í leik með HK gegn Gróttu. Hann er nú orðinn leikmaður Fjölnis. Mynd/Eyjólfur Garðarsson
- Auglýsing -
Handknattleiksmaðurinn Júlíus Flosason hefur verið lánaður til Fjölnis frá HK út þetta keppnistímabil. Júlíus lék sinn fyrsta leik með Fjölni í gærkvöld. Koma hans hafði góð áhrif því Fjölnisliðið vann sinn fyrsta leik í Grill 66-deildinni, 31:29, gegn Hvíta riddaranum.
Eftir tap í heimsókn til Västerås á fimmtudagskvöld þá risu Berta Rut Harðardóttir og samherjar í Kristianstad HK upp á afturlappirnar í dag og unnu öruggan sigur á Kungälvs HK, 38:29, á heimavelli. Berta Rut skoraði tvö af mörkum Kristianstad HK sem er um miðja deild með þrjú stig að loknum þremur leikjum.
Katla María Magnúsdóttir skoraði sex mörk og var næst markahæst hjá Holstebro þegar liðið vann BK Ydun, 32:28, í fimmtu umferð næst efstu deildar danska handknattleiksins í dag. Katla skoraði helming marka sinna úr vítaköstum. Holstebro er efst í deildinni með 10 stig eftir fimm leiki.
Jón Ísak Halldórsson skoraði eitt mark þegar lið hans Lemvig vann baráttusigur á KIF Kolding, 32:31, á heimavelli Kolding í dag. Lemvig er um miðja deild með fimm stig að loknum sex leikjum í næst efstu deild danska handknattleiksins. Jón Ísak kom Lemvig yfir, 30:29, með marki sínu. Hann kom til Lemvig í sumar eftir að hafa verið undir handleiðslu Arnórs Atlasonar hjá TTH Holstebro.
Dagur Sverrir Kristjánsson skoraði tvisvar þegar lið hans, Vinslövs HK, tapaði með 16 marka mun fyrir Skånela IF, 39:23, í þriðju umferð Allsvenskan, næst efstu deildar, sænska handknattleiksins í dag. Vinslövs HK hefur farið hægt af stað í deildinni og tapaði þremur fyrstu leikjum sínum og rekur lestina.
