Oddur Gretarsson kveður Balingen-Weilstetten í sumar eftir sjö ára veru. Mynd/Balingen Weilstetten
- Auglýsing -
Oddur Gretarsson er í liði 14. umferðar í þýsku 2. deildinni í handknattleik. Þetta er í þriðja sinn sem Oddur er í liði umferðinnar á leiktíðinni. Hann lék einu sinni sem oftar afar vel þegar Balingen-Weilstetten gerði jafntefli, 26:26, gegn Eisenach á útivelli á laugardaginn þegar efstu lið deildarinnar áttust við.
Óðinn Þór Ríkharðsson skoraði þrjú mörk þegar svissneska meistaraliðið Kadetten Schaffhausen vann Göppingen, 25:24. í A-riðli Evrópudeildarinnar í handknattleik í gærkvöld. Leikurinn fór fram í Þýskalandi. Aðalsteinn Eyjólfsson er þjálfari Kadetten sem hefur náð afar góðum árangri í keppninni til þessa og fengið átta stig af tíu mögulegum í öðru sæti.
Teitur Örn Einarsson skoraði eitt mark fyrir Flensburg í sex marka sigri liðsins á TM Benidorm í B-riðli Evrópudeildarinnar í gærkvöld, 38:32. Leikurinn var háður á Spáni. Flensburg er efst í B-riðli með átta stig af tíu mögulegum og fær ungverska liðið FTC í heimsókn í Flens-Arena á næsta þriðjudag.
Danskir fjölmiðlar fullyrða að Nykøbing Falster hafi fengið greiddar um 100.000 danskra króna fyrir söluna á hollensku landsliðskonunni Estavana Polman til rúmenska liðsins Rapid Búkarest í síðustu viku. Polman samdi við Rapid til tveggja ára og skorað fjögur mörk í fyrsta leik sínum með liðinu, gegn Györ, í Meistaradeildinni um síðustu helgi.
Franski landsliðsmaðurinn Hugo Descat er sagður vera í kapphlaupi við tímann um að ná heimsmeistaramótinu í handknattleik í næsta mánuði. Descat meiddist illa í hné um síðustu helgi í leik með Montpellier. Liðsfélagi Descat, Karl Konan, hefur víst afskrifað mótið eftir að hafa ristarbrotnað á dögunum.
Franska handknattleikskonan Raphaëlle Tervel hefur ákveðið að taka fram skóna eftir að þeir hafi legið upp á hillu í átta ár. Tervel sem er 43 ára gömul ætlar að freista þess að létta undir með sínu gamla liði Györ en margir leikmenn liðsins eru meiddir um þessar mundir.
Ítalski landsliðsmarkvörðurinn Domenico Ebner verður liðsfélagi Viggós Kristjánssonar hjá Leipzig frá og með næsta sumri. Ebner hefur samið við félagið til tveggja ára. Hann er nú markvörður hjá Hannover-Burgdorf.
