Markvörðurinn ungi, Arnór Máni Daðason, tryggði Fram bæði stigin í heimsókn liðsins til Stjörnunnar í Mýrina í kvöld. Hann varði síðasta skoti leiksins sem Tandri Már Konráðsson átti á mark Fram á síðustu sekúndu. Lokatölur, 32:31, fyrir Fram sem rauk upp í fjórða sæti deildarinnar með sigrinum. Liðið hefur 11 stig eftir níu leiki.
Myndskeið af síðustu sókn Stjörnunnar í leiknum og markvörslu Arnórs Mána er að finna hér fyrir neðan.
Stjarnan er áfram í 10. sæti Olísdeildar með fimm stig eftir níu leiki eins og HK sem lagði Víking í kvöld og sagt er frá hér og hér.
Staðan var jöfn í hálfleik í Mýrinni í kvöld, 16:16. Stjarnan hóf síðari hálfleik betur en eftir um tíu mínútna leik tóku Framarar frumkvæðið og héldu því til leiksloka þótt Stjörnumenn gerðu heiðarlega tilraun á síðustu mínútunum til þess að vinna upp fjögurra marka forskot Framara. Það tókst nærri því.
Staðan og næstu leikir í Olísdeildum.
Mörk Stjörnunnar: Starri Friðriksson 10, Egill Magnússon 7, Pétur Árni Hauksson 4, Benedikt Marinó Herdísarson 3, Hergeir Grímsson 2, Þórður Tandri Ágústsson 2, Hrannar Bragi Eyjólfsson 1, Tandri Már Konráðsson 1, Sigurður Jónsson 1.
Varin skot: Adam Thorstensen 19, Sigurður Dan Óskarsson 1.
Mörk Fram: Rúnar Kárason 10, Reynir Þór Stefánsson 9, Marko Coric 4, Ívar Logi Styrmisson 3, Stefán Orri Arnalds 2, Tryggvi Garðar Jónsson 1, Marel Baldvinsson 1, Jóhann Karl Reynisson 1, Theodór Sigurðsson 1.
Varin skot: Lárus Helgi Ólafsson 10, Arnór Máni Daðason 1.
