Spænski handknattleiksþjálfarinn Ambros Martín, sem var látinn taka hatt sinn og staf og hjá rússneska kvennalandsliðinu áður en það hafði leikið sinn lokaleik á EM í síðasta mánuði er að öllum líkindum aftur á leiðinni til ungverska stórliðsins, Györi ETO KC.
Ungverski fréttamiðilinn Bors greindi frá þessu í gær samkvæmt heimildum. Martín þekkir vel til í herbúðum Györi ETO KC. Hann þjálfaði liðið frá 2012 til 2018 og varð fimm sinnum ungverskur meistari, sex sinnum bikarmeistari til viðbótar við að stýra liðinu til sigurs í fjögur skipti í Meistaradeild Evrópu.
Martin hætti hjá Györi sumarið 2018 vegna ágreinings við stjórnendur félagsins um nýjan samning. Martín tók þá við Rostov-Don í Rússlandi og var samhliða þjálfari rússneska landsliðsins. Hann hætti hjá Rostov-Don í sumar og fékk svo sparkið hjá landsliðinu í síðasta mánuði.
Martín er afar vinsæll í Ungverjalandi. Hann hefur verið sterklega orðaður við þjálfun kvennalandsliðs Ungverjalands en margt bendir til að stórlið Györi verði ofan á í kapphlaupinu.
Gábor Danyi, sem var aðstoðarþjálfari Martín, hefur þjálfað Györi eftir að Spánverjinn kvaddi fyrir tveimur og hálfu ári.
