Alls höfðu verið seldir um 2.300 aðgöngumiðar til Íslendinga í dag á viðureign Íslands og Króatíu í Evrópumótinu í handknattleik karla. Leikurinn fer fram á morgun klukkan 14.30 í Malmö Arena. Að sögn Daníels Franz Davíðssonar starfsmanns HSÍ er útlit fyrir að enn fleiri stuðningsmenn karlalandsliðsins verði á viðureign Íslands og Svíþjóðar á sunnudaginn. Þegar hafa selst til Íslendinga nærri 2.600 miðar. Viðbúið er að fleiri bætist við á hvorn leik en enn er mögulegt að verða sér út um miða.
Útlit er þar með fyrir að hátt í jafn margir íslenskir stuðningsmenn verði í Malmö Arena á morgun og sunnudag og voru á leikjum riðlakeppninnar í Kristianstad Arena á dögunum. Malmö Arena rúmar um 15 þúsund áhorfendur.
Enn sem komið er hafa færri Íslendingar keypt miða á leikina við Sviss og Slóveníu á þriðjudag og miðvikudag.
