Afturelding hefur krækt í 17 ára gamlan miðjumann frá Haukum, Gísla Rúnar Jóhannsson. Hann gengur formlega til liðs við Aftureldingu í sumar og hefur ritað undir þriggja ára samning þessu til staðfestingar, segir í tilkynningu frá handknattleiksdeild Aftureldingar.
Í tilkynningu frá Aftureldingu segir ennfremur að Gísli Rúnar sé skapandi miðjumaður og komi strax í sumar inn í meistaraflokkshópinn hjá Aftureldingu. Hann hefur m.a. leikið með U-liði Hauka í Grill 66-deildinni í vetur.
„Gísli Rúnar hefur verið í yngri landsliðum Íslands og vonumst við til að Gísli þrói áfram handboltaferilinn sinn hjá okkur í Mosfellsbæ og verði lykilmaður í metnaðarfullum framtíðaráformum félagsins,“ segir orðrétt í fréttatilkynningu handknattleiksdeildar Aftureldingar á páskadag.
