Íslensku handknattleiksþjálfararnir þrír sem þjálfa landslið í Asíu fór afar vel af stað í 1. umferð forkeppni Ólympíuleikanna þegar flautað var til leiks í morgun í Doha í Katar. Baráttan stendur um eitt laust sæti í handknattleikskeppni Ólympíuleikanna sem fram fara í París á næsta ári.
Aron Kristjánsson og liðsmenn landsliðs Barein unnu stórsigur á landsliði Kasakstan, 46:18. Staðan að loknum fyrri hálfleik var 23:6.
Erlingur Richardsson stýrði landsliði Sádi Arabíu til sigurs á Indverjum, 46:17, eftir að hafa verið kominn með þægilega stöðu að loknum fyrri hálfleik, 25:7.
Japanska landsliðið, undir stjórn Dags Sigurðssonar, átti erfiðasta leikinn af liðunum þremur. Japan lagði Íran, 25:20, en sex mörkum munaði á liðunum í hálfleik, 14:8.
Barein og Japan mætast á morgun í annarri umferð í B-riðli. Sádi Arabar mæta Suður Kóreu.
Undankeppnin í Doha fer fram í tveimur riðlum samanlagt með 11 landsliðum. Tvö efstu lið hvors riðils komast í undanúrslit.
Eins og áður segir tryggir sigurliðið sér sæti í handknattleikskeppni Ólympíuleikanna á næsta sumri. Það sem hreppir annað sætið tekur sæti í forkeppni leikanna sem fram fer í mars í Evrópu.
