„Þótt Úrúgvæar hafi tapað stórt fyrir Þýskalandi þá er nú margt í lið þeirra spunnið og ljóst að við verðum að koma vel undirbúnar í viðureignina gegn þeim,“ segir Arnar Pétursson landsliðsþjálfari í handknattleik kvenna um andstæðing íslenska landsliðsins í lokaumferð C-riðils heimsmeistaramóts kvenna í handknattleik í dag; Úrúgvæ. Viðureignin hefst klukkan 14.30 og fer sigurliðið áfram í milliriðla. Á það stefnir íslenska landsliðið.
„Leikur Úrúgvæa er óhefðbundinn þeim sem við þekkjum í Evrópu og getur verið erfiður af þeim sökum. Við mættum Paragvæ á HM fyrir tveimur árum og vorum í brasi þótt okkur tækist að vinna þegar upp var staðið.
Í dag verðum við að leika almennilega vörn og ná að keyra hraðaupphlaup. Uppstilltur varnarleikur Úrúgvæ hefur verið ágætur fram til þessa og því verðum við að ná hraðaupphlaupsmörkum til þess að slíta okkur frá þeim,“ segir Arnar enn fremur.
Viljum fá fleiri alvöru leiki
Arnar segir markmiðið vera skýrt: vinna leikinn og komast í milliriðla. „Við viljum komast í milliriðla og fá fleiri alvöru leiki. Það skiptir okkar unga lið miklu máli fyrir framhaldið að fá þrjá leiki til viðbótar við landslið sem eru aðeins sterkari en við. Það eru leikir sem kenna okkar mikið. Við fáum mest út úr því,“ segir Arnar Pétursson.
Lengra viðtal við Arnar er að finna í myndskeiði hér fyrir ofan.
A-landslið kvenna – fréttasíða.
HM kvenna ”25 – dagskrá, riðlakeppni, úrslit
Landslið Íslands á HM kvenna 2025
