Aldís Ásta öflug í góðum sigri Skara á heimavelli

Aldís Ásta Heimidóttir og samherjar hennar í Skara HF unnu í dag VästeråsIrsta HF, 31:25, á heimavelli þegar keppni hófst aftur í sænsku úrvalsdeildinni í handknattleik eftir hlé vegna Evrópumótsins. Skara lyfti sér upp í sjötta sæti deildarinnar með átta stig eftir níu leiki. VästeråsIrsta HF er í fjórða sæti tveimur stigum fyrir ofan Skara.

Aldís Ásta lék vel í leiknum. Hún skoraði m.a. fjögur mörk í sex skotum auk þess að eiga sjö stoðsendingar. Félagi Aldísar Ástu Lisanne Kruijswijk fór á kostum og skoraði 12 mörk. Einnig var Isabella Mouratidou öflug í markinu með 14 skot varin, 40%.