Aldís og Lena í átta liða úrslit – Góð staða hjá Arnari Birki

Sænska meistaraliðið Skara HF komst örugglega í átta liða úrslit sænsku bikarkeppninnar í handknattleik kvenna í gær. Skara vann Lugi örugglega, 38:27, á heimavelli. Samanlagður sigur í tveimur viðureignum, 73:48.

Aldís Ásta Heimisdóttir skoraði þrjú af mörkum Skara HF á heimavellinum í gær en álaginu var dreift á milli leikmanna. Lena Margrét Valdimarsdóttir skoraði ekki mark.

Standa vel að vígi

Arnar Birkir Hálfdánsson og liðsfélagar í Amo HK standa vel að vígi eftir sigur á IFK Tumba HK, 29:26, á heimavelli Tumba í gær. Arnar Birkir skoraði þrjú mörk með þrumufleygum.

Síðari viðureign Amo HK og IFK Tumba verður háð á miðvikudaginn.