„Þetta er tólfta árið mitt í meistaraflokki Fjölnis. Eftir allan þann tíma þá gerast sigrarnir ekki sætari með troðfullum sal af Fjölnisfólki að ógleymdri upphituninni með okkar manni, Kristmundi Axel söngvara. Það er alvöru stemning í Grafarvogi,“ sagði hinn þrautreyndi leikmaður Fjölnis, Björgvin Páll Rúnarsson, í samtali við handbolta.is í Fjölnishöllinni í kvöld eftir að Fjölnir tryggði sér sæti í Olísdeildinni á næstu leiktíð með sigri á Þór, 24:23, í oddaleik fyrir framan nokkur hundruð áhorfendur.
Vel fór á að Björgvin Páll tryggði Fjölni sigurinn í kvöld með 24. markinu og sínu sjöunda í leikum 20 sekúndum fyrir leikslok.
„Við héldum haus og unnum tvo síðustu leikina á seiglunni. Okkur líður best að vera undir og koma svo með áhlaupi inn í leikina,“ sagði Björgvin Páll og brosti í kampinn á sigurstundu þegar handbolti.is hitti hann örstutt að máli í sigurfögnuðinum í Fjölnishöllinni í kvöld.
Spurður hvort hann ætlaði ekki að taka slaginn með Fjölni í Olísdeildinni í haust svaraði Björgvin Páll að of snemmt væri að hugsa um það í kvöld.
Sjá einnig:
Aðalmálið er að við unnum og náðum takmarki okkar
Umspil Olís karla: leikjadagskrá og úrslit
Fjölnir í Olísdeildina – eins marks sigur í oddaleiknum
