Samkvæmt frétt á vefútgáfu sænska Aftonbladet hefur annar af tveimur efnilegustu handknattleiksmönnum Færeyinga um þessar mundir, Elias Ellefsen á Skipagøtu, samið við þýska stórliðið THW Kiel frá og með sumrinu 2023. Ellefsen er samningsbundinn Sävehof í Svíþjóð fram á mitt næsta ár.
Aftonbladet hefur þetta samkvæmt heimildum sínum. Svo skemmtilega vildi til að Bertus Servaas, forseti pólska stórliðsins Vive Kielce, var ekki lengi skrifa undir færslu þar sem fréttinni var deilt á Twitter að hann staðfesti tíðindin. Servaas hefur verið drjúgur að semja við leikmenn, ekki síst þá yngri og efnilegri í Evrópu á síðustu árum og er ósjaldan með puttann á púlsinum.
Sé það rétt að Ellefsen hafi samið við Kiel verður hann fyrsti Færeyingurinn til þess að leika með liði félagsins sem er eitt það stærsta og sigursælasta í evrópskum handknattleik. Hann verður um leið annar Færeyingurinn sem leikur með liði í efstu deild í Þýskalandi. Sá fyrsti er Jóhan á Plógv Hansen sem reyndar ákvað síðar að leika frekar fyrir danska landsliðið en það færeyska. Hansen gekk til liðs við Flensburg í sumar eftir tveggja ára veru hjá Hannover-Burgdorf.
Ellefsen hefur vakið gríðarlega athygli á síðustu tveimur árum en hann samdi 18 ára gamall við Sävehof og er þegar orðinn burðarás hjá Partilleliðinu tvítugur að aldri. Ellefsen fór hamförum í þeim leikjum sem hann var með færeyska landsliðinu á Evrópumóti U20 ára landsliða í Porto í júli. Meiðsli komu í veg fyrir að hann gæti tekið þátt í þeim öllum.
Annar ungur færeyskur handknattleiksmaður sem vakið hefur athygli á síðustu vikum er 17 ára frændi Ellefsen, Óli Mittún. Hann varð markakóngur og besti leikmaður EM 18 ára landsliða fyrr í þessum mánuði. Mittún hefur samið við Sävehof. Ellefsen og Mittún eru systkinabörn.
