Arnar Freyr Guðmundsson hefur verið ráðinn þjálfari kvennaliðs ÍR í handknattleik en liðið er í efsta sæti Grill66-deildarinnar um þessar mundir.
Handknattleiksdeild ÍR greindi frá þessu í kvöld. Kemur fram að samkomulag hafi náðst við Arnar Frey um að þjálfa ÍR-liðið út keppnistímabilið sem nú stendur yfir. Hann er jafnframt yfirþjálfari yngri flokka ÍR.
Honum til aðstoðar verða Stefán Harald Berg Petersen og Hreiðar Levý Guðmundsson.
Arnar Freyr hefur stýrt ÍR í síðustu leikjum eða síðan í byrjun desember að Jakob Lárusson hvarf skyndilega frá störfum. Jakob hafði þá þjálfað ÍR-liðið frá því í sumar að hann tók við af Finnboga Grétari Sigurbjörnssyni.
ÍR er í efsta sæti Grill66-deildar kvenna með 19 stig eftir 11 leiki. Liðið er tveimur stigum á undan Selfoss sem á leik til góða.
