Arnór Atlason og Jóhannes Berg Andrason fögnuðu sigri í kvöld þegar lið þeirra TTH Holstebro vann Nordsjælland, 34:31, á heimavelli í fyrstu umferð dönsku úrvalsdeildarinnar í handknattleik. Ekki gekk eins vel hjá Guðmundi Þórði Guðmundssyni og lærisveinum hans í Fredericia HK. Þeir steinlágu á heimavelli fyrir Bjerringbro/Silkeborg, 38:28.
Upphafsleikir eru alltaf hættulegir fyrir liðin sem fyrirfram eru talin sterkari eins og tilfelli TTH Holstebro sem lék til úrslita um danska meistaratitilinn í vor. Þar af leiðandi var sigur í kvöld afar mikilvægur fyrir Arnór Atlason þjálfara TTH Holstebro sem er að hefja sitt þriðja keppnistímabil við stjórnvölin.
Jóhannes Berg gekk til liðs við TTH Holstebro í sumar. Hann fór vel af stað, skoraði tvö mörk í þremur skotum og getur vel við unað með frumraun sína í dönsku úrvalsdeildinni.
