Handknattleiksmaðurinn Arnór Snær Óskarsson er fluttur heim og hefur gengið til liðs við uppeldisfélag sitt Val. Arnór Snær, sem er gegnheill Valsari, hefur síðustu tvö ár leikið utan landssteinanna með Rhein-Neckar Löwen og Gummersbach í Þýskalandi. Síðasta árið hefur Arnór Snær, sem er 24 ára gamall, leikið með norska meistaraliðinu Kolstad í Þrándheimi.
Arnór hefur einnig verið valinn í íslenska landsliðið auk þess að hafa leikið með öllum yngri landsliðum Íslands.
„Ég er gríðarlega sáttur með að fá Arnór til liðs við okkur. Hann er frábær leikmaður sem og liðsfélagi. Hann á eftir að koma með mikil gæði og góða orku inn í okkar leikmannahóp. Það verður gaman að sjá hann aftur í Valstreyjunni,” segir Ágúst Þór Jóhannsson þjálfari Vals í tilkynningu félagsins í morgun.
Ljóst er að heimkoma Arnórs Snæs styrkir Valsliðið til muna í keppni Olísdeildar. Fyrsti leikur hans með Val verður væntanlega gegn Fram í Lambhagahöllinni á næsta fimmtudag.
