Aron Pálmarsson, Barcelona, og Steinunn Björnsdóttir, Fram, eru handknattleikskarl og handknattleikskona ársins valin af stjórn Handknattleikssambandsins Íslands. Þetta er í fimmta sinn sem HSÍ útnefnir Aron handknattleikskarl ársins. Steinunn hreppir nú nafnbótina handknattleikskona ársins í fyrsta sinn.
Steinunn Björnsdóttir er fyrirliði Fram sem varð deildar,- og bikarmeistarar í vor. Hún lék alla átján leiki liðsins í Íslandsmótinu og skoraði 96 mörk. Fram liðið varð deildarmeistari með því að sigra í sautján leikjum og tapaði einungis einum áður en Covid-faraldurinn batt enda á keppnistímabilið.
Seinni bylgjan valdi Steinunni besta leikmann Íslandsmótsins, besta varnarmanninn og þá var hún einnig í liði ársins.
Steinunn á að baki 35 landsleiki með A-landsliði kvenna og skoraði í þeim 27 mörk. Á dögunum var Steinunn kjörinn Íþróttmaður Reykjavíkur 2020.
Steinunn var fyrst valin í A-landslið kvenna 2012. Hún er 29 ára, er uppalin í Fram og spilaði með yngri flokkum félagsins. Hún hóf að leika með meistaraflokki Fram tímabilið 2009 – 2010. Í dag hefur Steinunn leikið tæplega 300 leiki með meistaraflokki Fram. Steinunn er sterk fyrirmynd fyrir yngri jafnt sem eldri handknattleiksiðkendur, innan vallar sem utan.
Aron Pálmarsson, vinstri skytta og leikstjórnandi hjá spænska meistaraliðinu Barcelona og A-landsliði karla. Aron varð þrefaldur meistari á Spáni á síðasta keppnistímabili með Barcelona auk þess sem hann og liðsfélagar tryggðu sér sæti í úrslitahelgi Meistarardeildar Evrópu sem fram fer nú á milli jóla og nýárs.
Aron er 30 ára gamall. Hann lék upp alla yngri flokkana með FH og lék sinn fyrsta meistaraflokks leik með liðinu í mars 2006. 19 ára gekk Aron til liðs við THW Kiel í Þýskalandi og var þar í sex ár. Árið 2015 færði Aron sig um set til Veszprém í Ungverjalandi. Fyrir þremur árum skipti Aron til Barcelona á Spáni og hefur síðan leikið með Katalóníurisanum.
Aron lék sinn fyrsta landsleik 29. október 2008. Síðan hefur hann leikið 149 landsleiki og skorað í þeim 579 mörk. Aron er fyrirliði landsliðsins. Sem atvinnumaður í handknattleik er Aron einstök fyrirmynd fyrir unga handknattleiksiðkendur bæði hér heima og erlendis.
