Árstíðabundnar fréttir af leikmönnum sem eru að koma eða fara frá handknattleiksliði Harðar á Ísafirði eru farnar að berast í stríðum straumi. Síðustu daga hefur Handkastið sagt frá hverjum leikmanninum á fætur öðrum sem hefur yfirgefið skipsrúm Ísafjarðarliðsins. Ofan á annað kvaddi Ungverjinn Endre Koi, sem þjálfað hefur Harðarliðið undanfarin tvö ár, útgerðina í vor. Portúgalskur þjálfari mun vera væntanlegur vestur til að taka við keflinu eftir því sem Handkastið segir frá og víst er að fótur er fyrir þeirri fregn.
Meðal þeirra sem léku með Herði á síðustu leiktíð og munu hafa í hyggju að róa á önnur mið er Ólafur Brim Stefánsson fyrrverandi leikmaður Gróttu og Vals sem kom til Harðar í upphafi síðasta vetrar eftir hálfgerða Bjarmalandsför til Slóvakíu.
Þýski markvörðurinn, Jonas Maier, sem mætti með fjaðraþyt og söng til Ísfjarðar leiktíðins 2023/2024 og gerði marga leikmenn Grill 66-deild hálf gráhærða þann vetur mun vera farinn af landi brott. Maier var ekki svipur hjá sjón á síðustu leiktíð, alltént þegar kom að frammistöðu á leikvellinum.
Japanski landsliðsmaðurinn Kenya Kasahara hefur kvatt Ísafjörð eftir að hafa leikið með Herði frá 2021 að einu ári undanskildu er hann spreytti sig í Póllandi.
Slóvakinn Oliver Rabek og Úkraínumaðurinn Lubomir Ivanytsia slógu ekki í gegn vestra á þeim fáu mánuðum sem þeir léku með Herði. Báðir eru farnir, að sögn Handkastsins.
Vera kann að breytingarnar hjá Herði séu fleiri. Virða verður til vorkunnar að gamaldags blaðamaður handbolta.is hendir ekki ekki alltaf reiður á breytingarnar vestra svo tíðar sem þær eru.
Hörður leikur í Grill 66-deild karla á næstu leiktíð eins og tvær leiktíðirnar á undan.
