Ásgeir Örn Hallgrímsson fyrrverandi atvinnu- og landsliðsmaður í handknattleik er sterklega orðaður við starf þjálfara karlaliðs Hauka eftir að Rúnar Sigtryggsson hætti skyndilega í dag og var ráðinn til Leipzig í Þýskalandi.
Heimildir handbolta.is herma að Ásgeir Örn sé ofarlega á óskalista Hauka.
Ásgeir Örn hefur ekki áður þjálfað meistaraflokkslið en hann er á hinn bóginn flest öllum hnútum kunnugur innan félagsins. Ásgeir Örn lék með Haukum um árabil áður en hann hélt í atvinnumennsku 2005 og einnig eftir að hann kom heim að henni lokinni sumarið 2018.
Haukar hafa ekki greint frá ráðningu eftirmanns Rúnars en í tilkynningu á Facebook-síðu handknattleiksdeildar segir að á morgun verði hulunni svipt af eftirmanni Rúnars. Í sömu tilkynningu er Rúnar kvaddur.
Tjörvi Þorgeirsson er aðstoðarþjálfari meistaraflokks karla. Ekki er annað vitað en að hann haldi sínu striki áfram.
Eins og kom fram á handbolta.is í dag þá hefur Rúnar tekið að sér þjálfun þýska 1. deildarliðsins DHfK Leipzig til loka yfirstandandi leiktíðar næsta vor.
