Hlaupið hefur á snærið hjá bikarmeisturum Aftureldingar en fyrir stundu var staðfest að Birgir Steinn Jónsson hafi skrifað undir þriggja ára samning. Birgir Steinn kemur í Mosfellsbæinn frá Gróttu þar sem hann hefur leiki síðustu þrjú ár.
Birgir Steinn er 23 ára gamall alhliða leikmaður sem hefur staðið sig gríðarlega vel í Olísdeildinni fyrir Gróttu undanfarin tímabil og verið á meðal markahæstu og stoðsendingahæstu leikmanna Olísdeildar. Á nýliðinni leiktíð skoraði Birgir Steinn 113 mörk í 20 leikjum en auk þess var hann með að meðaltali 4,2 stoðsendingar og 6,4 sköpuð færi í leik samkvæmt HBStatz.
Birgir Steinn lék upp yngri flokka og fyrstu árin í meistaraflokki með Stjörnunni. Hann var lánaður til Fjölnis á tímabilinu 2019/2020 en gekk að því loknu til liðs við Gróttu.
„Birgir Steinn er frábær viðbót við liðið okkar og kemur til með að styrkja okkar lið bæði sóknarlega og varnarlega fyrir komandi tímabil. Birgir er gríðarlega metnaðarfullur leikmaður og topp karakter sem smellpassar inn í þá vegferð sem við erum á hjá Aftureldingu,“ segir í tilkynningu handknattleiksdeildar Aftureldingar þar sem Gróttu er þökkuð fyrir fagmannleg vinnubrögð við félagaskiptin.
