Handknattleikskonan Birta Rún Grétarsdóttir færði sig um set innan norska handknattleiksins í sumar og gekk til liðs við Fjellhammer sem leikur í næst efstu deild. Hún hafði um tveggja ára skeið leikið með Oppsal en var því miður talsvert frá keppni vegna krossbandaslita.
„Ég var að æfa með Fjellhammer meðan ég var að ná mér og skrifaði svo undir samning í sumar,“ sagði Birta Rún við handbolta.is.
„Ég er ennþá að jafna mig eftir meiðslin í fyrra og þurfti að fara í aðra aðgerð í sumar. Ég stefni á að vera tilbúin að spila um miðjan september,“ sagði Birta Rún ennfremur en hún lék með HK hér á landi áður en hún flutti til náms í Noregi fyrir nokkrum árum.
Fjellhammer er austan við Osló, ekki langt frá Lillestrøm.
Ásgeir Snær Vignisson gekk til liðs við karlalið Fjellhammer í sumar en karlaliðið leikur í úrvalsdeildinni.
