Ungmennalið HK hafði betur gegn Selfossi í lokaleik fyrstu umferðar Grill 66-deildar kvenna í handknattleik í Kórnum í kvöld, 34:30, eftir að tveimur mörkum hafði skakkað á liðunum eftir fyrri hálfleik, 14:12, HK U í vil.
Eins og kom fram í samtali við Örn Þrastarson, þjálfara Selfoss-liðsins, á handbolta.is á föstudaginn þá varð talsverð uppstokkun á liði hans í sumar. Það er nú skipað yngri leikmönnum en stundum áður en þeim er ætlað að vaxa af reynslu á keppnistímabilinu.
Selfyssingar byrjuðu leikinn betur og voru yfir fyrstu fimmtán mínútur leiksins. HK-ingar tóku þá völdin og komust yfir og voru með tveggja marka forystu í hálfleik, 14:12, eins og áður sagði. Svipað var upp á teningnum í seinni hálfleik og Selfyssingar gerðu sig aldrei líklega til að gera alvöru atlögu að Kópavogsstúlkunum og þar við sat.
Sara Katrín Gunnarsdóttir átti stórleik hjá HK og skoraði 12 mörk. Heiðrún Berg Sverrisdóttir fór einnig á kostum og tókst að þenja út netmöskvana í 11 skipti. Sigurrós Hávarðardóttir, Eva Hrund Harðardóttir og Inga Dís Jóhannsdóttir skoruðu þrisvar sinnum hver. Aníta Eik Jónsdóttir og Lovísa Líf Helenudóttir skoruðu eitt mark hvor.
Tinna Sigurrós Traustadóttir sparaði ekki púðrið að þessu sinni. Hún skoraði hvorki fleiri né færri en 13 mörk fyrir Selfoss-liðið. Aðeins eitt markanna skoraði hún úr vítakasti. Lara Zidek var næst næst með 9 mörk. Ivana Raickovic skoraði 3 mörk, Thelma Lind Sigurðardóttir 2, Rakel Guðjónsdótir 2, og Elína Krista Sigurðardóttir 1.
Staðan í Grill 66-deild kvenna.
