Bryndís Hulda Ómarsdóttir, hefur framlengt samning sinn við handknattleiksdeild Stjörnunnar. Bryndís er 17 ára og er að koma upp úr yngri flokka starfi Stjörnunnar þar sem hún hefur sýnt mikinn dugnað og framfarir síðustu ár, ásamt því að vera fasta manneskja í unglingalandsliðum Íslands, segir í tilkynningu frá Stjörnunni.
Þrátt fyrir erfið meiðsli sem héldu Bryndísi frá vellinum heilan vetur kom hún sterk til baka á síðasta ári og styrktist með hverjum mánuðinum sem leið.
Framtíðin er björt hjá Bryndísi sem án efa á eftir að skína í búningi Stjörnunnar á komandi árum.
„Bryndís er fyrirmyndar íþróttakona sem ég er viss um að eigi eftir að ná langt. Er með hárrétt viðhorf, mikinn dugnað og innri vilja til að verða alltaf betri. Hennar styrkur er klárlega fjölbreytt skot utan af velli og svo er hún með mjög góða fótavinnu í stöðunni 1/1. Ánægjulegt að hún verði áfram með okkur,“ er haft eftir Patreki Jóhannessyni og Hönnu Guðrúnu Stefánsdóttur þjálfurum Stjörnunnar í tilkynningu í dag.
