Handknattleikssambönd Noregs, Danmerkur og Svíþjóðar hafa snúið bökum saman og krafist þess að Alþjóða handknattleikssambandið, IHF, breyti reglugerðum sínum um stuttbuxur kvenna á stórmótum landsliða. Þar er kveðið á um að annað búningasett landsliðs verði að vera með hvítum eða ljósum buxum.
Danska handknattleikssambandið hefur lengi viljað losna við hvítu stuttbuxurnar og nú er þrýstingurinn á IHF aukinn enn frekar. Danska handknattleikssambandið hefur tekið höndum saman við sænska og norska sambandið og sent bréf til Alþjóðahandknattleikssambandsins. Þar er krafist sérstakrar reglugerðarbreytingar um sex vikum fyrir heimsmeistaramót kvenna í handbolta.
Málið snýst um reglugerðir fyrir IHF-keppnir, þar sem fjöldi keppnisbúninga er ákveðinn. Þar er kveðið á um bæði ljósan og dökkan búning, þ.e. treyjur og buxur.
„Í hverjum leik skal eitt lið klæðast ljósum keppnisbúningi og hitt liðið dökkum keppnisbúningi. Litir og hönnun búninga liðanna tveggja verða að vera greinilega ólíkir,“ segir í grein 2.4.3.
Finna fyrir óöryggi
„Vandamálið er að stelpurnar finna fyrir miklu óöryggi vegna þessa, og þegar leikmaður er á blæðingum er þetta eðlilega nokkuð sem er truflandi. Við höfum lengi viljað breyta þessu, en nú höfum við lagt fram formlega beiðni um það,“ sagði Mette Vestergaard, varaformaður danska handknattleikssambandsins og fyrrverandi landsliðskona Dana í handknattleik í samtali við TV2Sport.
Kominn tími til
Varaformaður danska handknattleikssambandsins var sjálf farsæl handknattleikskona, tvöfaldur Ólympíu- og Evrópumeistari. „Við höfum reynt þetta sjálfar á mótum og lengi vel var IHF tilbúið til viðræðna. Nú teljum við tíma til kominn að festa þetta í reglur í stærra samhengi,“ sagði Vestergaard.
Vandræðalegt og niðurlægjandi
„Mér persónulega finnst þetta bæði vandræðalegt og niðurlægjandi, og þetta [tíðahringurinn] er eitthvað sem maður hefur enga stjórn á. Svo burt með hvítu stuttbuxurnar!,“ krafðist Veronica Kristiansen, landsliðskona
Noregs til margra ára, í viðtali við norsku sjónvarpsstöðina NRK.
Áskorun fyrir konur
Katrine Lunde, markvörður norska landsliðsins, leggur áherslu á að leysa málið í eitt skipti fyrir öll. „Ef það eru karlar sem ákveða þetta, þá skil ég að þetta sé kannski ekki það sem þeir hugsa mest um, en fyrir stelpur getur þetta verið áskorun.“
NRK vísar einnig í rannsókn þar sem kvennalið í fótbolta klædd hvítum stuttbuxum skora þriðjungi færri stig.
„Danmörk hefur til dæmis skráð hvítar, rauðar og svartar stuttbuxur fyrir þetta mót (HM 2025). Við munum gera allt sem í okkar valdi stendur til að tryggja að Danmörk og öll önnur lið, fái að spila í rauðum, svörtum eða öðrum dökkum stuttbuxum, að því gefnu að leikjadagskrá og aðstæður leyfi,“ er haft eftir talsmanni IHF hjá NRK.
