Annarri umferð í Olísdeild kvenna verður fram haldið í dag með tveimur leikjum en umferðin hófst í gærkvöld þegar Afturelding sótti ÍBV heim til Vestmannaeyja. Í dag fá Íslandsmeistarar KA/Þórs liðsmenn Stjörnunnar í heimsókn. Stutt er síðan liðin mættust í átta liða úrslitum Coca Cola-bikarsins. KA/Þór hafði betur, 28:23.
Fram fer suður á Ásvelli og leikur við Hauka en svo vill til að liðin léku einnig saman í átta liða úrslitum bikarkeppninar fyrr í þessum mánuði. Fram vann örugglega, 29:24.
KA/Þór vann ÍBV í hörkuleik í 1. umferð Olísdeildarinnar fyrir viku, 26:24. Stjarnan tapaði fyrir Fram, 24:22. Haukar fór vel af stað og unnu HK, 21:15, eftir að hafa leikið vel í síðari hálfleik.
Í gærkvöld hófst keppni í Grill66-deild karla með þremur leikjum sem greint er frá hér. Í dag mæta Kórdrengir til leiks. Þeir mæta Aftureldingu á Varmá klukkan 16. Kórdrengir fengu keppnisrétt í Grill66-deildinni í síðasta mánuði og hafa síðustu daga safnað að sér leikmönnum eins og kom fram í frétt handbolta.is í gær.
Leikir dagsins
Olísdeild kvenna:
KA-heimilið: KA/Þór – Stjarnan, kl. 16.30.
Schenkerhöllin: Haukar – Fram, kl. 16.30 – sýndur á Stöð2Sport.
Staðan og næstu leikir í Olísdeild kvenna.
Grill66-deild karla:
Varmá: Afturelding U – Kórdrengir, kl. 16.
Staðan og næstu leikir í Grill66-deild karla.
