Króatía, sem Dagur Sigurðsson þjálfar, tyllti sér á topp milliriðils 2 á Evrópumóti karla með því að leggja nágranna sína í Slóveníu að velli, 29:25, í Malmö Arena í Malmö í Svíþjóð í kvöld.
Króatía er með sex stig á toppnum og Ísland er í öðru sæti með fimm stig. Svíþjóð, sem á leik til góða gegn Ungverjalandi í kvöld, er í þriðja sæti með fjögur stig og Slóvenía er í því fjórða, einnig með fjögur stig.
Segja má að örlög Íslands séu í höndum Ungverja sem mæta Svíum í kvöld og Króötum annað kvöld.
Lokaumferð milliriðilsins fer fram strax á morgun þar sem Ísland mætir Slóveníu, Króatía mætir Ungverjalandi og Sviss mætir Svíþjóð. Sigur Króatíu dregur enn frekar úr möguleikum Íslands að komast í undanúrslit.
Í leiknum í kvöld var Króatía með yfirhöndina allan tímann en þar með er ekki sagt að Slóvenía hafi gefist upp.
Króatía var 14:11 yfir í hálfleik en Slóvenía náði að jafna metin í 18:18 og 19:19 um miðbik síðari hálfleiks. Aftur tókst Króötum hins vegar að taka af skarið, þeir stungu af undir lokin og unnu að endingu fjögurra marka sigur.
