Hornamaðurinn Daníel Karl Gunnarsson meiddist í fyrri hálfleik í viðureign Stjörnunnar og KA í Olísdeild karla í KA-heimilinu í gærkvöld. Hann kom ekkert meira við sögu í leiknum.
Ekki er ljóst hversu alvarleg meiðsli Daníels Karls eru en hann naut aðhlynningar sjúkraþjálfara Stjörnunnar og KA og studdist síðar við hækjur þegar hann fylgdist með framvindu leiksins í síðari hálfleik.
Daníel Karl gekk til liðs við Stjörnuna í sumar frá Selfossi en eystra lék hann fyrst með meistaraflokksliði Selfoss leiktíðina 2019/2020. Daníel Karl hefur skoraði fjögur mörk til þessa á leiktíðinni, öll í fyrsta leik Stjörnuliðsins í Olísdeildinni, gegn ÍBV í Mýrinni í Garðabæ.
KA vann leikinn naumlega í gærkvöld, 27:26, eftir mikla spennu, ekki síst á lokamínútunum. KA hefur þar með sex stig eftir fjóra leiki en Stjarnan er með tvö stig.
