Daníel Þór Ingason og samherjar í Balingen-Weilstetten unnu í kvöld annan leik sinn í röð í þýsku 1. deildinni í handknattleik og færast þar með nær öðrum liðum í neðri hluta deildarinnar. Balingen vann Wetzlar á útivelli í kvöld í fremur rólegri viðureign, alltént hvað markaskorun varðar, 21:16, eftir að hafa verið tveimur mörkum yfir að loknum fyrri hálfleik, 12:10.
Daníel Þór skoraði tvö mörk í þeim tveimur skotum sem hann átti á mark Wetzlar. Oddur Gretarsson var ekki með að þessu sinni, ekki fremur en gegn Göppingen á heimavelli á síðasta laugardag. Hann er meiddur.
Mohamed Essam Moustafa El-Tayar markvörður Balingen fór á kostum og varði 16 skot.
Í hinum leik kvöldsins í þýsku 1. deildinni lagði Göppingen liðsmenn Eisenach, 35:31, á heimavelli. Eisenach er í næst neðsta sæti deildarinnar með 13 stig eins og Bergischer HC. Balingen-Weilstetten rekur lestina með 11 stig og á auk þess inni leik á Eisenach.
Stöðuna í þýsku úrvalsdeildinni og í fleiri deildum evrópsks handknattleiks er að finna hér.
