Landsliðsmaðurinn í handknattleik, Daníel Þór Ingason, hefur skrifað undir nýjan samning við 2. deildarliðið Balingen-Weilstetten í suður Þýskalandi. Nýi samningurinn gildir til loka júní 2025 eftir því sem fram kemur í tilkynningu félagsins.
Daníel Þór, sem er 27 ára gamall, gekk til liðs við Balingen-Weilstetten sumarið 2021 eftir tveggja ára veru hjá Ribe-Esbjerg í dönsku úrvalsdeildinni. Áður lék Daníel Þór með Haukum og Val hér heima.
Balingen-Weilstetten féll úr þýsku 1. deildinni í vor en virðist stefna rakleitt upp í efstu deild á ný enda setið í efsta sæti 2. deildar frá því að blásið var til leiks í haust.
Daníel Þór er 35 manna landsliðshópnum sem valinn var fyrir HM í næsta mánuði. Hann hefur var í keppnishópnum á EM í upphafi þessa árs og var einnig með á EM 2020 og á HM 2019. Alls hefur Daníel Þór leikið 39 A-landsleiki. Á fimmtudaginn kemur í ljós hvort Daníel Þór verði í keppnishópi Íslands á HM.
