Donni og félagar standa vel að vígi – 13 marka sigur

Kristján Örn Kristjánsson, Donni, og liðsfélagar hans í danska úrvalsdeildarliðinu Skandeborg unnu Maritimo da Madeira Andebol, 38:25, í fyrri viðureign liðanna í forkeppni Evrópudeildarinnar í handknattleik karla í dag. Leikið var í Árósum. Skanderborg var 10 mörkum yfir að loknum fyrri hálfleik, 22:12.

Donni skoraði sex mörk í leiknum og var markahæstur leikmanna Skanderborg við þriðja mann.

Síðari leikurinn verður í portúgölsku eyjunni Madeira á sunnudaginn eftir rúma viku. Óhætt er að segja að Donni og félagar standi vel að vígi og eigi góða möguleiki á að ná sæti í C-riðli Evrópudeildarinnar sem hefst í október.