Áhorfspartý sem Klefinn.is og HSÍ og A-landsliðs kvenna stóðu fyrir vegna úrslitaleiks EM kvenna í Minigarðinum tókst afar vel. Um 120 börn og fullorðnir mættu og skemmtu sér afar vel ásamt meirihluta leikmanna kvennalandsliðsins.
„Ég er alsæl,“ segir Silja Úlfarsdóttir stjórnandi Klefans í samtali við handbolta.is þegar samkomunni var að ljúka í kvöld eftir að Þórir Hergeirsson og leikmenn norska landsliðsins höfðu unnið Dani í úrslitaleik EM en leikurinn var sýndur á tveimur breiðtjöldum í Minigarðinum.
„Við erum í samkeppni við jólin en það er greinilegt að áhuginn er mikill fyrir kvennalandsliðinu,“ segir Silja ennfremur í samtalinu við handbolta.is en myndskeið með viðtali við Silju og Díönu Dögg Magnúsdóttur er að finna í þessari frétt.
Skiptir miklu máli
Díana Dögg segir viðburð sem þennan vera kærkominn til þess að færa almenning nær kvennalandsliðinu auk þess sem hann undirstrikar mikilvægi þess að vekja enn meira athygli á kvennahandbolta. „Við viljum koma kvennaíþróttum á enn hærri stall en þær eru þegar á,“ sagði Díana Dögg.
Ætlar að endurtaka leikinn
Silja segist hiklaust ætla að endurtaka leikinn og vera með annan viðburð tengdan kvennalandsliðinu í handknattleik. „Ég vil gera eitthvað skemmtilegt þegar við mætum Ísrael í umspili HM,“ sagði Silja Úlfardóttir sem ásamt Klefinn.is skipulagði viðburðinn og á skildar alúðarþakkir fyrir.
Myndskeiðsviðtal er við Silju og Díönu Dögg ofar í þessari grein.
A-landslið kvenna – fréttasíða.
