„Við vorum komnir í slæma stöðu töp í síðustu leikjum. Þar af leiðandi höfum við verið í innri baráttu um að koma til baka og vinna einn leik. Margt hefur verið okkur mótdrægt og síðasti gær meiddist einn á síðustu mínútu á æfingu. Í ljósi alls sem á undan er gengið er ég mjög stoltur af strákunum að snúa við blaðinu og vinna leikinn í kvöld,“ sagði Ásgeir Örn Hallgrímsson þjálfari Hauka í samtali við handbolta.is í kvöld að loknum langþráðum sigri Hauka á HK, 26:24, eftir fjóra tapleiki í röð í Olísdeildinni.
„Mér fannst bara margir leikmenn stíga upp að þessu sinni í þeirra erfiði stöðu sem við vorum í. Lykilleikmenn héldu haus út í gegn þrátt fyrir mikla keyrslu,“ sagði Ásgeir Örn sem m.a. kallaði Stefán Rafn Sigurmannsson úr meiðslum fryrr en gert var ráð fyrir.
Spurður hvað hann hafi sagt við menn fyrir leikinn svaraði Ásgeir að hann hafi viljað sjá sína menn ná sér upp úr flatneskju undanfarinna viðureigna og sýna á heimavelli að þeim væri ekki alveg sama hvernig þeir léku á heimavelli fyrir framan stuðningsmenn sína.
„Mér fannst menn bara sýna stolt og svara því sem þeir voru beðnir um að gera,“ sagði Ásgeir Örn Hallgrímsson þjálfari Hauka og ljóst var að þungu fargi var af honum og leikmönnum létt eins og nærri má geta.
Guðmundur Hólmar Helgason lék ekki með vegna meiðsla sem hann varð fyrir á æfingu í gær. Eins voru Kristófer Máni Jónasson og Sigurður Jónsson fjarverandi af sömu ástæðum.
Staðan í Olísdeildinni og næstu leikir.
