Handknattleikssamband Evrópu, EHF, hefur frestað tveimur leikjum ísraelska kvennalandsliðsins í undankeppni EM 2024 sem til stóð að færu fram í vikunni. Ástæðan er ástandið í Ísrael þar sem stríðsátök ríkja í landinu og ekki með nokkru móti hægt að tryggja öryggi íþróttafólks. Til viðbótar hafa yfirvöld í Ísrael bannað íþróttafólki að yfirgefa landið eins og ástatt er.
Annars vegar er um leik Slóvaka og Ísrael sem fram átti að fara í Slóvakíu á miðvikudaginn og hinsvegar viðureign Ísraels og Þýskalands sem búið var að setja á dagskrá í Tel Aviv á laugardaginn.
EHF segir ákvörðun sína tekna með tilliti til öryggis allra sem að leikjunum áttu að koma. Auk þess þá hefur ísraelska handknattleikssambandinu verið tilkynnt af yfirvöldum í Ísrael að íþróttamönnum landsins sé óheimilt að yfirgefa landið eins og málum sé komið.
Vonir standa til þess að leikirnir verði settir á dagskrá þegar aðstæður leyfa en undankeppninni lýkur næsta vor.
