Handknattleikssamband Evrópu, EHF, hefur staðfest að Ísland verður í efri styrkleikaflokki þegar dregið verður í umspilsleiki heimsmeistaramóts kvenna í Vínarborg á morgun áður en úrslitaleikir Evrópumóts kvenna í handknattleik. Ísland hefur aldrei áður verið í efri flokknum þegar dregið er í umspil fyrir HM kvenna.
Nöfn þjóðanna verða dregin saman upp úr tveimur skálum. Það sem fyrr kemur upp á heimaleik í fyrri umferð umspilsins. Vegna þess er ekki öruggt að liðin úr flokki 1 eigi heimaleikinn í síðari umferð umspilsins.
Flokkur 1: Svíþjóð, Svartfjallaland, Pólland, Slóvenía, Rúmenía, Sviss, Spánn, Austurríki, Tékkland, Ísland, Færeyjar.
Flokkur 2: Norður Makedónía, Króatía, Tyrkland, Serbía, Potúgal, Úkraína, Slóvakía, Ísrael, Ítalía, Kósovó, Litáen.
Leikir í apríl
Fyrri umferð umspilsins verður 9. og 10. apríl. Síðari umferðin 12. og 13. apríl (pálmasunnudagur).
Þegar dregið var í umspilsleikina fyrir HM 2023 var Ísland í flokki 2 eftir að hafa unnið landslið Ísraels tvisvar sinnum í forkeppni síðla árs 2022. Ísland dróst síðan á móti Ungverjalandi í umspilinu og tapaði í apríl 2023. Vegna athyglisverðs árangurs þá fékk Ísland ásamt Sviss boð, wild card, til þátttöku á HM.
Handbolti.is ætlar að fylgjast með framvindunni þegar dregið verður í Vínarborg á morgun.
HM kvenna fer fram í Hollandi og Þýskalandi frá 27. nóvember til 14. desember á næsta ári.
