Norska meistaraliðið Kolstad hefur fengið undanþágu hjá Handknattleikssambandi Evrópu, EHF, til þess að leika næsta heimaleik sinn í Meistaradeild í Kolstad Arena í Þrándheimi í stað Trondheim-Spektrum. Umræddur leikur verður gegn ungverska meistaraliðinu One Veszprém.
Kolstad Arena rúmar 2.500 áhorfendur í sæti en í Trondheim-Spektrum er a.m.k. sæti fyrir 8.600 áhorfendur. Kolstad Arena rúmar mun færri áhorfendur en krafa er gerð til keppnishúsa í Meistaradeild Evrópu.
Ekki liggur fyrir af hverju þessi breyting var heimiluð en því hefur verið fleygt að EHF komi til móts við Kolstad af fjárhagslegum ástæðum. Dýrt er leigja Trondheim-Spektrum auk þess sem áhuginn fyrir heimaleikjum liðsins hefur ekki verið slíkur að uppselt hafi verið á fyrri viðureignir liðsins í stóru keppnishöllinni. Alls hafa mætt rúmlega 13.000 áhorfendur á þrjá heimaleiki Kolstad í Meistaradeildinni fram til þessa, flestir á leik gegn Aalborg Håndbold, liðlega 6.000.
