Einar Jónsson þjálfari karlaliðs Fram hefur framlengt samning sinn hjá handknattleiksdeild Fram til ársins 2026. Þetta kom fram í tilkynningu handknattleiksdeildar sem send var út í kvöld meðan Framliðið barðist við FH í 1. umferð Olísdeildar á heimavelli Íslandsmeistaranna. Einar hefur í núverandi lotu þjálfað karlalið Fram frá 2021 er hann flutti heim eftir veru í Færeyjum og Noregi.
Í tilkynningu Fram segir að Einar muni áfram stýra þjálfun meistaraflokks karla og koma að öðrum verkefnum innan félagsins, svo sem afreksþjálfun, þjálfun yngri flokka og fleira.
Einar var með bæði kvenna- og karlalið Fram á síðasta keppnistímabili en dró saman seglin í sumar og sagði sig frá þjálfun kvennaliðsins.
„Það er ánægjulegt að framlengja samning við Einar og njóta liðsinnis hans við að byggja upp það öfluga starf sem fram fer hjá félaginu,“ segir orðrétt í tilkynningu frá Fram.
